Bagong taon, bagong kanta! #Gloc9 #indierelease #parehotayo
Para buksan ang 2016, may bagong kanta si Gloc-9, isang independent release na libreng mada-download at mapapakinggan ng kanyang mga tagahanga at tagasuporta. Ito ang Pareho Tayo, isang kantang tatak Gloc-9 sa pagtingin sa lipunang nagdarahop at nahihirapan, at pagsipat sa mga sulok at iskinita ng bayang hindi natin gustong pag-usapan.
Narito ang buhay ng bawat Pinoy na patuloy na lumalaban araw-araw, isa man itong paulit-ulit na pagharap sa kahirapan, wala mang maaninag na pagbabago sa kinabukasan.
Mahal na bigas utang sa tindahan
Mahabang listahan na di mo pa nababayaran
Tapos pila pa sa bus, traysikel at jeep
O kaya nama’y sa tren laging nakakainip
Sa Pareho Tayo, pinipilit tayong muli ni Gloc-9 na makita ang ayaw nating tingnan, na pakinggan ang paghihirap na laging sinasabi sa’tin ay atin nang nalagpasan.***